السلام عليكم
ملاحظة: هذ شي لي تنقول ماشي حقيقة مسلمة راه كاين احتمالية الخطأ والصواب، المهم تنعطيك على حساب تجربتي.
أي حاجة ممكن تبيعها بار انترنت كيف ما بغات تكون لي طاح ليك على بالك ممكن تبيعو، غير هو خاصك تعرف شي حوايج على حساب ما تيبان ليا:
أول حاجة المنثوج لي غا تبغي تبيع من الأحسن تكون تتفهم في المجال ديالو، عرف المنثوج، ولي غا يشري والسوق يعني المنافسين ديالك، لكان المنثوج من عندك يعني نت عندك سلعة رااه مزيانة بزااف مكانش عندك فخاصك:
1 - تلقا من عندمن غا تاخدو وبشحال غا يتقام عليك وبشحال هو داير في سوق أو واش كاين عندوا زبائن لي غا يشريو 2 - كيفاش غا توصل لناس باش يشريوه من عندك، وبشحال التكلفة ديال التسويق يعني الإشهارات لي غادي دير ليه في مواقع التواصل الإجتماعي
3 - واش المنثوج لي غا تبيع نت مادي شي حاجة فيزيك تتقاص بليد ولا منثوج خداماتي خدمة تتعطيها لناس بمقابل مادي
4 - بيع شي حاجة متيبيعوهاش الناس الأخرين أو لي تيبيعوها قلال ولكانت تتباع بكثرة على الأقل بيع بطريقة مختالفة على الأخرين
في أغلب الحالات لما كانوا الحلات كاملين خاصك دير راسك بلاصة في الويب، خاصك تكون حاضر في أغلب المنصات، باش تسوق لراسك وترجع منك أو من لبرودويات لي تتبيع علامة تجارية على الويب وهذ شي خاصو وقت وخدمة وفلوس وثقة يعني بنادم تعطيه شي حاجة لي كاينة باش تكون عندك عشرة طويلة مع لكليان
ناخدو كمثال نت بغيتي تبيع وتشري فمنثوجات ديال النظافة على ما تنظن هذا هو الدومين ديالك، كيفاش ممكن دير ليه الإشهار انا نقوليك كل منصة واش لي مزيان فيها وبشحال غا طلع عليك
Facebook: فيه مايدرا ولعرفتي كيفاش توصل لناس ممكن تبيع وتشري معاهم مزيان وزيد عليها ممكن دير لإشهار من فيس بوك لأنستغرام ديركت، نقدر نقوليك هذا الخيار رقم 1 ورخيص على بزااف
Google Ads: بالنسبة لسوق المغربي بلا متستعملوا لأخرين حسن منوا، ولكن هو أكثر دقة من الأخرين لحقاش نية الشراء تتكون مرتافعة هنا، ملي تيقلب واحد في غوغل على شي سلعة فغالبا تتكون عندو نية الشراء، ولكن صعيب باش الناس يعطيو اهتمام لمنثوج تاع النظافة، ولا الأغلب تاع المنثوجات الناس تيقلبو تيمشيو ديركت لسيتات لكبار
Instagram: مزيان لكنتي بغيتي تبيع برودويات لمراوات أو لكنتي بغيتي تشهر لحقاش هو مزيان كمنصة لترويج لعلامات أو التفاعلات مع الإعلانات ديالك، لا تعرفي تولي تبيع وتري فيه بلا إشهارات غا من المتابعين ديالك، يعني هو مزيان لكنت غا تخدم على المدا الطويل
YouTube: لكان برودوي الجمهور ديالو هما المراوات فراه تقدر توصل ليهم في أغلب الفيديوات ديال الطبخ، الأعمال المنزلية أو أي حاجة خاصة بالنظافو والديور ديال المراوات، ولكن المشكلة فيه هو خاصك تقاد فيديو ويكون محتارم تاع بصح، وخاص المراوات يكون عندهم منين يشريو ياما ديهم لصفحة ديال لفيس بوك ديالك أو تقاد ويب سيت وأغلبية ماغا يفهموش في ويب سيت فلأحسن واتس اب
LinkedIn: لكنت بغيتي أهل الإختصاص فهذي أحسن منصة وهي أغلى منصة، لكنت بغيتي شركا فعليك بيها
راه ممكن تبيع وتشري في الامازون تشد سلعة من عند شي مورد وتبيعها تماك Supplier كاين واحد لعيبة ممكن تشد سلعة وتبيعها في Amazon Prime
ولكن نصحك سير في دومين ديالك وبيع لمغاربة راه السوق المغربي ولا فيه مايدار وباقي طري بزااف